सरपंच, ग्रामसेवक आणि सदस्यांच्या नावे सुसाईड नोट, ग्रामपंचायत कर्मचाऱ्याचा शेतात गळफास
गोंदिया 6: जिल्ह्यातील आमगाव तालुका पंचायत समिती अंतर्गत ग्रामपंचायत गोसाईटोला येथील ग्रामपंचायत कर्मचारी संजय हिवकराज रंगारी (वय 45 वर्षं) यांनी सरपंच, ग्रामसेवक आणि इतर ग्रामपंचायत सदस्यांच्या त्रासाला कंटाळून आत्महत्या केल्याची धक्कादायक घटना घडली आहे. रंगारी यांनी स्वतःच्या शेतातील झाडाला गळफास लावून घेत आत्महत्या केल्याचे सांगण्यात आले आहे.
संजय रंगारी हे काल सायंकाळपासून बेपत्ता होते. आज सकाळी त्यांच्या शेताच्या बाजूला असणाऱ्या एका शेतकऱ्याने त्यांच्या कुटूंबाला माहिती दिली की मृतक हे स्वतःच्या शेतात किन्हीच्या झाडाला गळफास लावलेल्या अवस्थेत दिसून आले. याबाबतची माहिती मिळताच पोलीस घटनास्थळी दाखल झाले असता मृतकाच्या जवळ एक चिठ्ठी आढळून आली.
मृतकाजवळ सापडलेल्या चिठ्ठीमध्ये सरपंच, ग्रामसेवक आणि ग्रामपंचायत सदस्यांच्या त्रासाला कंटाळून आणि पदावरून काढण्याच्या धमकीमुळे आपण आत्महत्या करीत असल्याचे नमूद केले आहे. फिर्यादी हिवकराज रंगारी यांच्या तक्रारीवरून पोलीस ठाण्यात तक्रार नोंदवण्यात आली आहे. दरम्यान, याप्रकरणी आमगाव पोलीस पुढील तपास करीत आहेत.
