देवरी: शहरात जय श्री राम ग्रुप, देवरी यांच्या वतीने देवाधिदेव भगवान महादेव यांच्या भक्तीभावाने प्रेरित भव्य कावड यात्रेचे आयोजन रविवार, दि. २३ ऑगस्ट २०२६ रोजी करण्यात आले आहे. या धार्मिक सोहळ्यामुळे देवरी शहरात शिवभक्तांमध्ये उत्साहाचे वातावरण निर्माण झाले असून मोठ्या संख्येने भाविक सहभागी होणार आहेत.
या कावड यात्रेला सकाळी ६.३० वाजता नगरपंचायत देवरीजवळील शिवमंदिरातून सुरुवात होणार आहे. येथून भाविक वाहनांच्या माध्यमातून वडेगाव येथील महादेव घाटावर पोहोचतील. महादेव घाटावरून पवित्र गंगाजल घेऊन कावड यात्रा पुन्हा देवरीकडे रवाना होणार आहे. भक्तिमय वातावरणात कावडधारी शिवभक्त पवित्र जल घेऊन भगवान भोलेनाथाच्या चरणी अर्पण करणार आहेत.
कावड यात्रेत सहभागी होणाऱ्या भाविकांसाठी समितीच्या वतीने प्रति व्यक्ती ५९ रुपये शुल्कामध्ये कावडीची व्यवस्था करण्यात आली आहे. तसेच ज्या भक्तांना स्वतःची कावड घेऊन सहभागी व्हायचे आहे, त्यांनाही त्यानुसार सहभागी होता येणार आहे. कावड यात्रेत सहभागी होऊ इच्छिणाऱ्या भक्तांनी आपली नावे दि. १८ ऑगस्ट २०२६ पर्यंत नोंदविण्याचे आवाहन आयोजकांनी केले होते.
भाविकांच्या सोयीसाठी देवरीहून वडेगाव येथील महादेव घाटापर्यंत जाण्यासाठी वाहनांची व्यवस्था करण्यात आली आहे. त्यामुळे परिसरातील शिवभक्तांनी मोठ्या संख्येने कावड यात्रेत सहभागी होऊन धार्मिक उत्सवाची शोभा वाढवावी, असे आवाहन आयोजकांकडून करण्यात आले आहे.
शिवसंध्या आणि भव्य झांकी
कावड यात्रेनंतर सायंकाळी ७ वाजता शिवसंध्या व भव्य झांकीचे आयोजन करण्यात आले आहे. वाराशिवणी (म.प्र.) येथील श्वेता शर्मा यांच्या वतीने शिवसंध्या व झांकीची भक्तिमय प्रस्तुती करण्यात येणार आहे. या कार्यक्रमातून भगवान शिवाच्या विविध रूपांचे दर्शन भाविकांना घडणार असून धार्मिक वातावरणात भक्ती, संगीत आणि सांस्कृतिक सादरीकरणाचा संगम अनुभवता येणार आहे.
तसेच कार्यक्रमाच्या निमित्ताने भाविकांसाठी भव्य महाप्रसादाचे आयोजन करण्यात आले आहे. महादेवाच्या भक्तीत सहभागी होणाऱ्या सर्व भाविकांनी कावड यात्रा, शिवसंध्या, झांकी आणि महाप्रसादाचा लाभ घ्यावा, असे आवाहन आयोजकांनी केले आहे.
या भव्य धार्मिक उपक्रमाच्या आयोजनासाठी दिपक शाहु, कुनाल कत्रे, महेश गुप्ता, दुर्गेश शाहु, राहुल शाहु, मुकेश रक्षणवार, प्रजोत भेंडारकर, शुभम नागरीकर, सचिन राणा, मधुसुधन अग्रवाल, सुनंदाबाई कुंभरे यांच्यासह समस्त देवरीवासीय परिश्रम घेत आहेत.
“हर हर महादेव”च्या जयघोषात निघणाऱ्या या भव्य कावड यात्रेत देवरी व परिसरातील सर्व शिवभक्तांनी मोठ्या संख्येने सहभागी व्हावे, असे आवाहन जय श्री राम ग्रुप, देवरी यांच्या वतीने करण्यात आले आहे.
