प्रहार टाईम्स विशेष वृत्त
देवरी : नागपूर पदवीधर मतदार संघाची निवडणूक जाहीर झाली असून, आगामी २३ ऑक्टोबर रोजी मतदान प्रक्रिया पार पडणार आहे. या निवडणुकीत गोंदिया जिल्ह्यात एकूण १९,१०५ मतदार आपला मतदानाचा हक्क बजावणार आहेत. पदवीधर मतदार संघाचे आमदार ॲड. अभिजित वंजारी यांचा कार्यकाळ संपल्यानंतर या निवडणुकीकडे संपूर्ण जिल्ह्याचे लक्ष लागले होते. निवडणूक विभागाकडून राज्यातील पाच विधान परिषद संघांच्या निवडणुकीचा कार्यक्रम जाहीर करण्यात आला आहे.
निवडणूक कार्यक्रम व महत्त्वाच्या तारखा
- निवडणुकीच्या कार्यक्रमाची अधिसूचना २९ सप्टेंबर रोजी प्रसिद्ध करण्यात येणार आहे.
- आगामी ६ ऑक्टोबरपर्यंत नामांकन अर्ज स्वीकारले जाणार आहेत.
- प्रत्यक्षात २३ ऑक्टोबर रोजी मतदान प्रक्रिया पार पडणार आहे.
तालुकनिहाय अंदाजित मतदार संख्या
या मतदार संघात नागपूर, गोंदिया, भंडारा, चंद्रपूर, वर्धा आणि गडचिरोली या जिल्ह्यांतील मतदारांचा समावेश आहे. गोंदिया जिल्ह्यातील तालुकावार अंदाजित मतदार संख्या खालीलप्रमाणे आहे:
- तिरोडा: १३७ मतदार
- गोंदिया: ५२३४ मतदार
- आमगाव: २००८ मतदार
- गोरेगाव: १५७४ मतदार
- सालेकसा: ८६० मतदार
- सडक अर्जुनी: १२७९ मतदार
- देवरी: १७५५ मतदार
- अर्जुनी मोरगाव: २७३६ मतदार
निवडणुकीनंतर जिल्ह्याचा विसर आणि मतदारांची भूमिका
नागपूर पदवीधर मतदार संघाचे नेतृत्व करणाऱ्या जनप्रतिनिधीला समाविष्ट असलेल्या सहा जिल्ह्यांना समान वागणूक देणे गरजेचे आहे. मात्र, आजपावेतो या मतदार संघाचे नेतृत्व नागपूर जिल्ह्याकडेच राहिल्यामुळे निवडणूक जिंकल्यानंतर गोंदिया जिल्ह्याचा विसर पडतो, असा अनुभव गेल्या सहा वर्षांत येथील पदवीधर मतदारांनी घेतला आहे.
यामुळे आगामी निवडणुकीत गोंदिया जिल्ह्यातील मतदार निष्क्रियता दाखवणाऱ्या उमेदवारांना धडा शिकवण्याच्या तयारीत असल्याचे दिसून येत आहे. विशेष म्हणजे, या मतदार संघाचे नेतृत्व करणाऱ्या आमदाराला पूर्ण कार्यकाळात प्रचार माध्यमाच्या प्रतिनिधींना भेटण्याची वेळ मिळत नाही, तर गोंदिया जिल्ह्यातील मतदारांच्या समस्या कसे काय जाणून घेणार? असा सवालही उपस्थित केला जात आहे. दुसरीकडे, महाविकास आघाडी व महायुतीकडून रिंगणात कोणाला उतरवण्यात येणार, याबाबतची चाचपणी देखील पदवीधर मतदार करू लागले असून उत्सुकता वाढली आहे.
