गोंदिया: शिकाऊ डॉक्टरचा रुग्ण तरुणीवर बलात्कार; घटनेने खळबळ
गोंदिया : एमबीबीएसची पदवी घेतल्यावर ग्रामीण रुग्णालय रजेगाव येथे शिकाऊ डॉक्टर म्हणून काम करणाऱ्या २६ वर्षांच्या डॉक्टरने २२ वर्षीय रुग्ण तरुणीवर बलात्कार केल्याची घटना उघडकीस आली. १५ मार्चच्या सकाळी ६.३० वाजता रजेगाव येथील ग्रामीण रुग्णालयात ही घटना घडली. हडमक डोंगराम माली (२६, रा. रमेश कॉलनी, सांचूर, राजस्थान) असे आरोपी डॉक्टरचे नाव आहे.
गोंदिया तालुक्यातील रजेगाव ग्रामीण रुग्णालयात पाच ते सहा शिकाऊ डॉक्टर म्हणून काम करतात. यापैकी एक हडमक डोंगराम माली (२६) याने त्याच रुग्णालयात रुग्ण म्हणून दाखल झालेल्या २२ वर्षांच्या तरुणीवर बलात्कार केला. या घटनेसंदर्भात रावणवाडी पोलिसांनी आरोपीवर भादंविच्या कलम ३७६ अन्वये गुन्हा दाखल केला आहे. आरोपीला अटक करण्यात आली असून, तपास पोलीस निरीक्षक उद्धव डमाळे करीत आहेत.
