गॅस सिलेंडरच्या दरामध्ये पुन्हा २५ रुपयांची वाढ

वृत्तसंस्था / नवी दिल्ली : महिन्याच्या पहिल्या दिवशी म्हणजे 1 सप्टेंबरला सामान्य माणसाला मोठा धक्का बसला आहे. सरकारी तेल कंपन्यांनी पुन्हा एकदा घरगुती एलपीजी सिलेंडरच्या किमतीत 25 रुपयांची वाढ केली आहे. स्वयंपाकाच्या गॅसच्या वाढत्या किमतींमुळे लोकांच्या घराचे बजेटच बिघडले आहे आणि यामुळे सामान्य जनताही खूप अस्वस्थ झाली आहे. अवघ्या 15 दिवसात विनाअनुदानित एलपीजी सिलेंडरच्या किंमतीत 50 रुपयांनी वाढ झाली आहे. अनुदानाशिवाय 14.2 किलो गॅस सिलेंडरची किंमत 25 रुपयांनी वाढली आहे. त्याचबरोबर 19 किलो कमर्शिअल गॅस सिलेंडरच्या किंमतीत 75 रुपयांनी वाढ झाली आहे. या वाढीनंतर मुंबईत 14.2 किलो एलपीजी सिलेंडर 884.5 रुपये झाले आहे. तर पूर्वी ते 859.50 रुपये होते. जर तुम्हाला एलपीजी गॅस सिलेंडरची किंमत तपासायची असेल तर आधी तुम्हाला तेल कंपनीची अधिकृत वेबसाईट https://iocl.com/Products/IndaneGas.aspx वर जावे लागेल. येथे कंपन्या दर महिन्याला नवीन दर जारी करतात. या वर्षी जानेवारीमध्ये दिल्लीत एलपीजी सिलेंडरची किंमत 694 रुपये होती, जी फेब्रुवारीमध्ये वाढवून 719 रुपये प्रति सिलेंडर करण्यात आली. 15 फेब्रुवारीला किंमत वाढवून 769 रुपये करण्यात आली. यानंतर, 25 फेब्रुवारी रोजी एलपीजी सिलेंडरची किंमत 794 रुपये करण्यात आली. मार्चमध्ये एलपीजी सिलिंडरची किंमत 819 रुपयांपर्यंत कमी करण्यात आली. जुलै आणि ऑगस्टमध्ये किंमती वाढवण्यात आल्या होत्या. मे आणि जूनमध्ये घरगुती सिलेंडरच्या किंमतीत कोणताही बदल झाला नाही. त्याच वेळी, एप्रिलमध्ये एलपीजी सिलेंडरच्या किंमतीत 10 रुपयांची कपात करण्यात आली होती.