ट्रॅक्टरच्या अपघातात एक जण ठार, पाच जखमी !
अर्जुनी/मोर : भरधाव वेगात ट्रॅक्टर चालवनाऱ्या चालकाचा ट्रॅक्टर वरील नियंत्रण सुटून ट्रॅक्टर पलटी होऊन चालकाचा जागीच मृत्यू तर ट्रॅक्टर वरील पाच जण जखमी झाल्याची घटना शनिवार 12 जुन रात्री दहा वाजता दरम्यान वडसा कोहमारा राज्य मार्गावरील खामखुरा जवळ घडली.
जखमिंवर ग्रामीण रुग्णालय अर्जुनी मोरगाव येथे उपचार सुरू असून मृतकाचे शवविच्छेदन करून घटनेची नोंद अर्जुनी मोरगाव पोलीस ठाण्यात करण्यात आली आहे. मृतक चालक योगेश डाकराम ढोरे (42) रा. कुरुड जि. गडचिरोली हा वडसाच्या दिशेने ट्रॅक्टर क्रमांक एम एच ३४ एल 1577 घेऊन जात होता.
भरधाव वेगाने असलेल्या या ट्रॅक्टर चालकाचा खामखुरा जवळील वळणावर वाहनावरील नियंत्रण सुटून ट्रॅक्टर रोडच्या खाली पलटी झाला. यात चालक योगेश डाकराम ढोरे याला जबर मार लागून जागीच मृत्यू झाला. अन्य पाच जण जखमी झाले. जखमींमध्ये घनश्याम सिबु कचरे (43), राजू चरणलाल वर्मा (45), चंद्रशेखर महादेवराव कबोडे (45), मनीष चंद्रशेखर खोब्रागडे (35) सर्व रा. गोंदियाचे व ग्यानबा महादेव पारधी (50) कुरुड, जिल्हा गडचिरोली हे गंभीर जखमी झाले.
फिर्यादी दुर्योधन मधुकर पिलारे (35) राहणार कुरुड, जिल्हा गडचिरोली याच्या तक्रारीवरून अर्जुनी मोरगाव पोलीस स्टेशन येथे अपराध क्रमांक 140/2021,कलम 279,337,304 भादवी सह कलम 184 मोवाका अंतर्गत गुन्हा दाखल करण्यात आला. ठाणेदार महादेव तोदले यांच्या मार्गदर्शनात पोलिस नायक चंद्रकांत भोयर, पोलिस नायक प्रशांत बोरकर पुढील तपास करीत आहेत.
