बस व कंटेनरच्या धडकेत महिलेसह ७ जणांचा जागीच मृत्यू

भोपाळ : मोठा अपघात झाला आहे. मध्य प्रदेशातील भिंडमध्ये एक प्रवासी बस आणि कंटेनरमध्ये जोरदार धडक बसली आहे. या भीषण अपघातात एका महिलेसहित 7 लोकांचा मृत्यू झाला आहे. तर 15 हून अधिक लोक जखमी झाले आहेत. भिंडमध्ये राष्ट्रीय महामार्ग 92 वर गोहाड चौकाजवळ हा भीषण अपघात झाला आहे. जखमींपैकी चार जणांची प्रकृती गंभीर असल्याने त्यांना ग्वाल्हेरला पाठवण्यात आले आहे. सध्या पोलिसांनी कंटेनर चालकाला अटक केली आहे. आज बस ग्वाल्हेरहून उत्तर प्रदेशातील बरेलीला भिंड मार्गे प्रवाशांसह जात होती. ही बस गोहाड चौकाजवळ वळली आणि पुरा येथे पोहोचताच भिंडकडून गोहाडच्या दिशेने येणाऱ्या कंटेनरला जाऊन धडकली. ही धडक इतकी जोरदार होती की कंटेनर बसला धडकून दरीत कोसळला. अपघात झालेली बस ग्वाल्हेरहून बरेलीला जात होती, अशी माहिती मिळाली.
घटनेची माहिती मिळताच पोलीस घटनास्थळी पोहोचले. पोलिसांनी सर्व जखमींना गोहाड रुग्णालयात पाठवले आहे. तसेच सात जणांचे मृतदेह पोस्टमार्टमसाठी पाठवण्यात आलेत. जखमींपैकी चार जणांची प्रकृती गंभीर असल्याने डॉक्टरांनी त्यांना ग्वाल्हेरला उपचारासाठी पाठवलं आहे. पोलिसांनी कंटेनर चालकाला अटक केली आहे. पोलिसांनी 7 पैकी 4 मृतांची ओळख पटवली आहे, ज्यात मृतांची ओळख रजत राठोड जिल्हा ग्वाल्हेर, हरेंद्र तोमर जिल्हा इटावा, हरिओम पटेरिया जिल्हा हरदोई, राणी आदिवासी जिल्हा सागर अशी आहे. पोलिसांनी मृतांच्या कुटुंबीयांना घटनेची माहिती दिली असून तीन मृतांची ओळख पटवण्याचे काम सध्या सुरु आहे. घटनेनंतर जिल्हाधिकारी सतीश कुमार आणि पोलीस अधीक्षक मनोज सिंह यांनीही घटनास्थळी दाखल होऊन घटनेचा आढावा घेतला. पोलिसांनी या घटनेचा तपास सुरू केला आहे.

Print Friendly, PDF & Email
Share