सुप्रिया सुळें आणि प्रफुल्ल पटेलांनी घेतली राज्यपालांची भेट
प्रफुल पटेल यांनी घेतलेल्या राज्यपालांच्या भेटीची राजकीय वर्तुळात चर्चा
राज्यातील करोना परिस्थितीत हळूहळू सुधारणा होत असली, तरी रुग्णासंख्या अजूनही चिंता वाढवणारी आहे. त्यातच मराठा समाजाला आरक्षण देणारा कायदा सर्वोच्च न्यायालयाने रद्द केल्यानं राज्यात दोन्ही मुद्द्यांवरून चर्चा सुरू आहे. यातच राष्ट्रवादींच्या नेत्यांनी राज्यपाल भगतसिंह कोश्यारी यांची घेतलेली भेट राजकीय वर्तुळात चर्चेचा विषय ठरत आहे.
खासदार प्रफुल पटेल यांनी आज राज्यपाल भगतसिंह कोश्यारी यांची राजभवन येथे सदिच्छा भेट घेतली. ही भेट सुमारे एक तास चालली. pic.twitter.com/GrtIj4HDG9
— Governor of Maharashtra (@maha_governor) May 10, 2021
राज्यात करोना आणि मराठा आरक्षणाच्या मुद्द्यावरून चर्चा सुरू असतानाच राष्ट्रवादीच्या महत्त्वाच्या दोन नेत्यांनी राज्यपालांची काही दिवसांच्या अंतराने भेट घेतली. या भेटींची सध्या राजकीय वर्तुळात चर्चा होत असून, भाजपाचे आमदार नितेश राणे यांनी प्रफुल्ल पटेल आणि राज्यपाल भगतसिंह कोश्यारी यांच्या भेटीचं ट्विट रिट्वट केल्यानं अनेकांनी भुवया उंचावल्या असून, तर्कविर्तक लावले जात आहेत.
राष्ट्रवादीच्या नेत्या आणि खासदार सुप्रिया सुळे यांनी काही दिवसांपूर्वी राज्यपाल भगतसिंह यांची २ मे रोजी भेट घेतली होती. सुळे यांनी राज्यपालांची सदिच्छा भेट घेतल्याचं सांगण्यात आलं. मात्र, सुप्रिया सुळे यांच्या भेटीपाठोपाठ आता राष्ट्रवादीचे ज्येष्ठ नेते प्रफुल्ल पटेल यांनी राज्यपालांची भेट घेतली. पटेल आणि राज्यपालांमध्ये जवळपास तासभर चर्चा झाली. मात्र, सुप्रिया सुळे यांच्या पाठोपाठ पटेल यांनी भेट घेतल्यानं या भेटींची चर्चा होत आहे. आश्चर्याची बाब म्हणजे भाजपाचे आमदार नितेश राणे यांनी पटेल-राज्यपाल भेटीचं ट्विट रिट्विट केलं आहे. त्यामुळे या भेटी नेमक्या कशासाठी होतं आहे? अशी चर्चा आता सुरू झाली आहे.
खासदार सुप्रिया सुळे यांनी आज राज्यपाल भगतसिंह कोश्यारी यांची राजभवन, मुंबई येथे सदिच्छा भेट घेतली. pic.twitter.com/JU25er85RN
— Governor of Maharashtra (@maha_governor) May 2, 2021
दहा दिवसांत राष्ट्रवादीच्या दोन नेत्यांनी राज्यपालांची भेट घेतली आहे. दोघेही पक्षातील महत्त्वाचे नेते असल्याने या भेटीमागील कारण मात्र कळू शकलेलं नाही. राज्यपालांच्या या भेटीबद्दल पटेल यांच्याकडून अद्याप कोणतंही ट्विट करण्यात आलेलं नाही, मात्र राज्यपाल कार्यालयाच्या अधिकृत ट्विटर हँडलवर या भेटीची माहिती देण्यात आली. विशेष म्हणजे नितेश राणे यांनी भेटीचं रिट्विट केलं आहे.
